![](https://federaljournalmm.org/wp-content/uploads/2023/10/signal-2023-10-31-083637_004.jpeg)
ကွတ်ခိုင်မှာ လက်နက်ကြီးကျည်ကျရောက်ပေါက်ကွဲလို့ အရပ်သား ၃ဦး သေဆုံး
ဖယ်ဒရယ်ဂျာနယ်၊ မြန်မာ
အောက်တိုဘာ ၃၁၊ ၂၀၂၃
ရှမ်းပြည်နယ်မြောက်ပိုင်း၊ ကွတ်ခိုင်မြို့နယ်မှာ အောက်တိုဘာလ ၃၀ရက်၊ ညနေပိုင်းအချိန်က လက်နက်ကြီးကျည်ကျရောက်ပေါက်ကွဲလို့ အရပ်သား ၃ဦးထိမှန်သေဆုံးခဲ့တယ်လို့ ဒေသခံတွေထံကနေ သိရပါတယ်။
ကွတ်ခိုင်မြို့နယ်၊ နမ့်ဖတ်ကာရပ်ကွက် ၂၊ ပြည်ထောင်စုလမ်းမကြီးပေါ်ကို အောက်တိုဘာလ ၃၀ရက်၊ ညနေ ၅နာရီခွဲဝန်းကျင်က လက်နက်ကြီးကျည် ၁ လုံးကျရောက်ပေါက်ကွဲခဲ့တာဖြစ်ပြီး လမ်းသွား လမ်းလာ ၃ ဦးကို ထိမှန်ခဲ့တာဖြစ်တယ်လို့ သိရပါတယ်။
“လမ်းမကြီးပေါ်ကို ကျတာ၊ မနေ့ညနေ ၅ နာရီခွဲလောက်ကပေါ့။ ယောင်္ကျားလေး ၂ ယောက်နဲ့ မိန်းကလေး ၁ ယောက်ကို ထိသွားတာ၊ ၃ ယောက်လုံးကတော့ သာမန်အရပ်သား၊ ဒီကဒေသခံ ဗမာလူမျိုးတွေပဲ” လို့ ဒေသခံတစ်ဦးက FJMM ကို ပြောပါတယ်။
အဲဒီလိုကျရောက်ပေါက်ကွဲမှုကြောင့် အမျိုးသား ၁ ဦးက အခင်းဖြစ်နေရာမှာ ပွဲချင်းပြီးသေဆုံးခဲ့ပြီး အမျိုးသား ၁ ဦးနဲ့ အမျိုးသမီး ၁ ဦးကတော့ နမ့်ဖတ်ကာတိုက်နယ်ဆေးရုံမှာ ဆေးကုသမှုခံယူနေစဉ် သေဆုံးသွားတယ်လို့ သိရပါတယ်။
ဒီပစ်ခတ်မှုကို မည်သူက ပစ်ခတ်မှန်း လက်ရှိအချိန်အထိ မသိရသေးပါဘူး။ နမ့်ဖတ်ကာနဲ့ အနီး ပတ်ဝန်းကျင်တွေမှာလည်း အောက်တိုဘာလ ၃၀ရက်က တိုက်ပွဲဖြစ်ပွားတာမရှိဘူးလို့ ဒေသခံ တွေထံကတဆင့် သိရပါတယ်။
ဓါတ်ပုံ – CJ