သထုံ နဲ့ ပေါင်မြို့နယ်ရှိ အဝေးပြေးလမ်းအနီး ကျေးရွာများထဲ စစ်ကောင်စီ စစ်ကြောင်း ဝင်ရောက်စစ်ဆေးနေ
ဖက်ဒရယ်ဂျာနယ်၊ မြန်မာ
စက်တင်ဘာ ၁၃ ရက်၊ ၂၀၂၃။
မွန်ပြည်နယ်၊ သထုံမြို့နယ်နှင့် ပေါင်မြို့နယ်တို့တွင် ရန်ကုန်- မော်လမြိုင် အဝေးပြေးလမ်းမအနီးရှိ ကျေးရွာများတွင် စစ်ကောင်စီ စစ်ကြောင်း ဝင်ရောက် စစ်ဆေးမှုတွေ ပြုလုပ်နေတယ်လို့ ဒေသခံတွေထံမှ သိရပါတယ်။
ရန်ကုန်- မော်လမြိုင် အဝေးပြေးလမ်းမအနီးရှိ ကျေးရွာများဖြစ်တဲ့ သထုံမြို့နယ်၊ တောင်စွန်းကျေးရွာ၊ သရက်တောကျေးရွာ၊ ဒေးဗရိန်းကျေးရွာ နှင့် ပေါင်မြို့နယ် သဗြုချောင်ကျေးရွာ၊ ရင်းငြိမ်မြောက်ကျေးရွာ ရှိ လမ်းမကြီးပေါ်တွင် စစ်ကောင်စီတပ်သားများ စစ်ကြောင်းထိုး သွားလာ လှုပ်ရှားနေတယ်လို့ သိရပါတယ်။
” စစ်သားတွေက ကုလားချောင် ဘုန်းကြီးကျောင်းနဲ့ ရင်းငြိမ်မြောက်ကျေးရွာက ဓမ္မိကာရုံ ဘုန်းကြီးကျောင်းတွေမှာ စခန်းချပြီးနေနေတယ်။ အနီးနားမှာရှိတဲ့ရွာတွေကို လိုက်ပတ်နေတာတွေ တွေ့ရတယ်။ လမ်းထဲမှာတွေ့တဲ့ လူတွေကိုလည်း စစ်ဆေးနေတာတွေ လုပ်တယ်။ ” လို့ ဒေသခံတစ်ဦးမှ FJMM ကိုပြောပါတယ်။
အဆိုပါ စစ်ကြောင်းမှ စစ်ကောင်စီတပ်သားများက လမ်းထဲက ဆိုင်ကယ်တွေကို စစ်ဆေးခြင်း၊ ဆိုင်ကယ် နှစ်ယောက်စီးထားရင် တားစီးစစ်ဆေးခြင်းများနှင့် တံခါးပိတ်ထားသော အိမ်များကိုလည်း ဝင်ရောက်စစ်ဆေးခြင်းများ ပြုလုပ်လျှက်ရှိကြောင်း သိရပါတယ်။
စစ်ကောင်စီတပ်သားများရဲ့ စစ်ကြောင်းထိုး လှည့်လည်သွားလာနေခြင်းများကြောင့် ဒေသခံတွေရဲ့ စိုးရိမ်မှု မြင့်မားလျှက်ရှိနေကြောင်း သိရပါတယ်။
