တိုင်းဗဟို ၉ မှ လက်နက်ကြီးပစ်ခတ်သံ နှစ်ရက်ဆက်တိုက်ကြားရ
ဖက်ဒရယ်ဂျာနယ်၊ မြန်မာ
ဇူလိုင်လ ၁၃ ရက်၊ ၂၀၂၃။
ရခိုင်ပြည်၊ မင်းပြားမြို့နယ်ရှိ စစ်ကောင်စီတပ်ရဲ့ လေ့ကျင့်ရေးသင်တန်းကျောင်းတစ်ခုဖြစ်တဲ့ တိုင်းဗဟို – ၉ သင်တန်းကျောင်း မှ လက်နက်ကြီး ပစ်သံတွေကို နှစ်ရက်ဆက်တိုက် ကြားခဲ့ရတယ်လို့ ဒေသခံတွေက ဆိုပါတယ်။
လက်နက်ကြီး ပစ်သံတွေဟာ မနေ့ကတစ်ကြိမ်ကြားခဲ့ရသလို့ ဒီနေ့ နံနက်ပိုင်းကလည်း ထပ်မံကြားခဲ့ရတယ်လို့ တိုင်းဗဟိုကိုးသင်တန်းကျောင်း အနီးမှာရှိတဲ့ ကမ်းနီကျေးရွာသားတစ်ယောက်က ပြောပါတယ်။
” မနေ့ကလည်း ပစ်တယ်။ ဒီနေ့လည်း ပစ်တယ်။ မနေ့ကလည်း မနက်ကတည်းက နေ့လယ်အထိ ပစ်တယ်။ ဒီနေ့မနက်ကလည်း ထပ်ပြီးတော့ ပစ်တယ်” လို့ ဆိုပါတယ်။
လက်နက်ကြီးစမ်းသပ်ပစ်ခတ်မယ့်အကြောင်းအား အနီးအနားမှ ကျေးရွာတချို့သို့ အကြောင်းကြားထားတာတွေရှိသော်လည်း ဘယ်နှစ်ရက်ကြာအထိ ပစ်ခတ်မယ်ဆိုတာနဲ့ပတ်သက်ပြီးတော့ တိုင်းဗဟို (၉) ရှိ စစ်ကောင်စီတပ်သားများက ပြောဆိုထားတာမရှိဘူးလို့ သူကဆက်ပြောပါတယ်။
” လက်နက်ကြီးစမ်းသတ်ပစ်ခတ်ဖို့ရှိတယ်။ အဲဒါကြောင့် လက်နက်ကြီးပစ်ခတ်မယ့် တောနား တောင်နားတွေကို မသွားဖို့တော့ သူတို့ဖက်က အကြောင်းကြားထားတာတွေရှိတယ်။ ဒါပေမဲ့ ဘယ်နှစ်ရက်ထိ ပစ်ခတ်မယ်ဆိုတာတွေကိုတော့ မပြောထားဘူး” လို့ ဆိုပါတယ်။
ရခိုင်ပြည်တွင် ရက္ခိုင့်တပ်တော် (AA) နဲ့ စစ်ကောင်စီတပ်တို့ဟာ ၂၀၂၂ ခုနှစ်၊ နိုဝင်ဘာလမှစတင်ကာ နှစ်ဖက်နားလည်မှုနဲ့ အပစ်ရပ်ထားခဲ့ပါတယ်။
လတ်တလောအခြေအနေတွင် အခုလိုမျိုး လက်နက်ကြီးပစ်ခတ်သံတွေ ကြားရတဲ့အတွက် ဒေသခံလူထုတွေဟာ စိုးရိမ်ကြောင့်ကြနေတယ်လို့လည်း ဆိုပါတယ်။
