မွန်တော်လှန်ရေးအဖွဲ့များမပါဝင်တဲ့ မွန်အမျိုးသားညီလာခံကို ကန့်ကွက်ကြောင်းပြော
ဖက်ဒရယ်ဂျာနယ်၊ မြန်မာ
ဧပြီ ၃၊ ၂၀၂၅
အာဏာသိမ်းစစ်ကောင်စီကို တော်လှန်နေကြတဲ့ မွန်တော်လှန်ရေးအဖွဲ့တွေကို ပါဝင်ခွင့်မပြုဘဲ စစ်ကောင်စီ ရွေးကောက်ပွဲကို ထောက်ခံအားပေးကြတဲ့ မွန်ညီညွတ်ရေးပါတီ MUP အပါအဝင် တခြားသောအဖွဲ့တွေ တက်ရောက်ကြမယ့် မွန်အမျိုးသားညီလာခံကို မွန်တော်လှန်ရေးအဖွဲ့တွေက ကန့်ကွက်ရှုတ်ချကြောင်း သဘောထားထုတ်ပြန်ထားပါတယ်။
မွန်ပြည်နယ်၊ မော်လမြိုင်မြို့၊ စျေးကြိုရက်ကွက်ရှိ ရာမညနိကယ ဓါတုမာလာ မွန်ပရိယတ္တိကျောင်းတိုက်မှာ ဧပြီ ၂ ရက်မှ ၅ ရက်အထိ အမျိုးသားရေးဆိုင်ရာ မူဝါဒတွေကို အတည်ပြုသုံးသပ်ဖို့ ရည်ရွယ်ချက်တွေနဲ့ ၂၀၂၅ ခုနှစ် မွန်အမျိုးသားညီလာခံကို မွန်ပြည်သစ်ပါတီ ဗဟိုကနေ ဦးဆောင်ပြီး ကျင်းပနေတာပါ။
မွန်ပြည်ဖက်ဒရယ်ကောင်စီ(MSFC) ဘက်ကတော့ “ယခုအချိန်သည် မွန်လူမျိုးတို့၏ နွေဦးတော်လှန်ရေးအပေါ်ထားရှိသော အမြင် နှစ်ဖက် ကွဲပြားနေခြင်းကြောင့် “မွန်အမျိုးသားညီလာခံ” ဟူသည့် အမည်နာမဖြင့် ကျင်းပရန်မသင့်တော်ဟု ယူဆသောကြောင့် ဧပြီလ ၂ ရက်နေ့မှ ၅ ရက်နေ့အထိ မွန်ပြည်သစ်ပါတီ(ဗဟို) မှ ဦးဆောင်သော မွန်အမျိုးသားညီလာခံတရပ်အား မော်လမြိုင်မြို့တွင် ကျင်းပမည့် လက်မခံနိုင်ပါ” လို့ ထုတ်ပြန်ထားပါတယ်။
မွန်ပြည်သစ်ပါတီ စစ်အာဏာရှင်တိုက်ဖျက်ရေး (NMSP-AD) အနေနဲ့လည်း “မော်လမြိုင်မြို့ပေါ်မှာ မွန်အမျိုးသားညီလာခံကျင်းပတာဟာ မွန်တမျိုးသားလုံးရဲ့အသံကို ကိုယ်စားပြုနိုင်မှာ မဟုတ်သလို မွန်အမျိုးသားတွေရဲ့ ကိုယ့်ကြမ္မာကိုယ် ဖန်တီးပိုင်ခွင့်ရရှိဖို့ ရုန်းကန်တိုက်ပွဲဝင်နေချိန် နိုင်ငံရေးအမြင်တွေလည်း ကွဲပြားနေတဲ့အတွက် အမျိုးသားရေးလုပ်ငန်းစဉ်တွေကို တဘက်တည်းအမြင်နဲ့ ဆုံးဖြတ်နေတာက အမျိုးသားညီညွတ်ရေးကို ပိုမို ပျက်ပြားစေနိုင်တယ်”လို့ ထုတ်ပြန်ပြောဆိုထားပါတယ်။
မွန်ပြည်သစ်ပါတီက ဦးဆောင်ကျင်းပတဲ့ မွန်အမျိုးသားညီလာခံ (၂၀၂၅ ခုနှစ်) ကို မွန်ပြည်သစ်ပါတီ ကိုယ်စားလှယ်တွေ၊ မွန်ညီညွတ်ရေးပါတီ ကိုယ်စားလှယ်တွေ၊ အရပ်ဘက် လူမှုအဖွဲ့အစည်းက ကိုယ်စားလှယ်တွေ၊ သံဃာတော်တွေအပြင် ဖိတ်ကြားထားသူတွေနဲ့ လေ့လာသူ စုစုပေါင်း ၂၀၀ ကျော် တက်ရောက်ခဲ့ကြကြောင်း သိရပါတယ်။
မွန်အမျိုးသားလွတ်မြောက်ရေးတပ်တော် (MLA) ကတော့ စစ်ကောင်စီ သက်ဆိုးရှည်အောင် မွန်အမျိုးသားညီလာခံ ဖြစ်မြောက်ရေး ဦးစီးဦးဆောင်ကော်မတီကနေ ကျင်းပတဲ့ မွန်အမျိုးသားညီလာခံကို ရှုတ်ချကန့်ကွက်တယ်လို့ ဧပြီ ၁ ရက်က အသိပေး ကြေညာထားပါတယ်။
လက်ရှိ မြန်မာနိုင်ငံ ဒေသတချို့မှာ ငလျင်ဒဏ် ဆိုးရွားစွာ ခံစားနေရချိန် မွန်အမျိုးသားညီလာခံ ကျင်းပတာဟာ လုံးဝမဖြစ်သင့်ဘူးလို့ မွန်လူထုများနဲ့ မွန်တော်လှန်ရေးအင်အားစုတွေအကြား ဝေဖန်မှုတွေလည်း ရှိနေပါတယ်။
