စစ်ကောင်စီက ယာယီအပစ်ရပ်ကြေညာပေမယ့် ဝိုင်းမော်မှာ ထိုးစစ်ဆင်တိုက်ခိုက်နေတယ်လို့ KIO ပြော
ဖက်ဒရယ်ဂျာနယ်၊ မြန်မာ
ဧပြီ ၃၊ ၂၀၂၅
စစ်ကောင်စီဟာ မတ်လ ၂၈ ရက်နေ့ကလှုပ်ခတ်ခဲ့သည့် ငလျင်နောက်ဆက်တွဲ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်နိုင်စေရန် ရည်ရွယ်လျက် ၂၀၂၅ ဧပြီ (၂) ရက်မှ (၂၂) အထိ ယာယီအပစ်ရပ်ကြောင်း ယမန့်နေ့ ဧပြီ ၂ ရက်နေ့ညပိုင်းမှာ ထုတ်ပြန်ကြေညာထားပေမယ့် ဒီကနေ့ ဧပြီ(၃) ရက်နေ့မှာ ကချင်လွတ်မြောက်ရေးအဖွဲ့(KIO) ဘက်ကို ထိုးစစ်ဆင် တိုက်ခိုက်နေတယ်လို့ KIO ဒုတိယဗိုလ်ချုပ်ကြီး ဆွမ်လွတ်ဂွမ်မော်က အသိပေးလာပါတယ်။
ဝိုင်းမော်မြို့နယ်ထဲက လမြန် ကျေးရွာအနီး KIO တပ်စခန်းတည်ရှိတဲ့ဘက်ကို ဒီကနေ့ ဧပြီ(၃) ရက်နေ့မှာ စစ်ကောင်စီက ထိုးစစ်ဆင်တိုက်ခိုက်နေပြီး ဝိုင်းမော်အခြေစိုက် စစ်ကောင်စီတပ် ခလရ(၅၈) ကလည်း လက်နက်ကြီးများ ပစ်ကူနေကာ လေကြောင်းဖြစ်လည်း ဗုံးကြဲတိုက်ခိုက်မှုများကို ပြုလုပ်နေတယ်လို့ ဆိုပါတယ်။
” ဒီကနေ့ မနက်ပိုင်းကစပြီး ခလရ(၅၈) တပ်ကနေ လက်နက်ကြီးတွေ ဆက်တိုက်ပစ်နေတာ၊ လေယဉ်ဗုံးလည်း လာကြဲသွားသေးတယ်။ အသံကလည်း အကျယ်ကြီးပဲ ကြားနေရတာ” လို့ ဝိုင်းမော်မြို့ခံတစ်ဦးကလည်း ပြောပါတယ်။
ယမန်နေ့ညပိုင်းထုတ်ပြန်ထားတဲ့ စစ်ကောင်စီ၏ ယာယီအပစ်ရပ်ထုတ်ပြန်ချက်နှင့် စပ်လျဉ်းပြီး ငလျင်နောက်ဆက်တွဲ ကူညီကယ်ဆယ်ရေးနှင့် ပြန်လည်ထူထောင်ရေးလုပ်ငန်းများ ဆောင်ရွက်နိုင်စေရန် ရည်ရွယ်လျက် ထုတ်ပြန်တာဖြစ်ကြောင်း နားလည်တာဖြစ်လို့ ကချင်လွတ်မြောက်ရေးအဖွဲ့(KIO) ဘက်ကလည်း ဧပြီ (၂)ရက်နေ့မှ (၂၂) အထိ ခုခံကာကွယ်ခြင်းမှအပ ထိုးစစ်ဆင် တိုက်ခိုက်မှုများကို ရပ်ဆိုင်းထားမှာ ဖြစ်တယ်လို့ တန်ပြန်ထုတ်ပြန်ထားပါတယ်။
ဒါပေမယ့် စစ်ကောင်စီ၏ ယာယီအပစ်ရပ်ထုတ်ပြန်ချက် အပိုဒ်(၄)ပါ အကြောင်းအရာ အချက်အလက်များကို တိုင်းရင်းသားတော်လှန်ရေးအဖွဲ့နှင့် တော်လှန်ရေးတပ်ဖွဲ့များသာမက မြန်မာ့တပ်မတော် (စစ်ကောင်စီ)ဘက် ကလည်း လိုက်နာရန် လိုအပ်ကြောင်း ကြိုတင် အသိပေး ထုတ်ပြန်ထားတာပါ။
စစ်ကောင်စီ၏ ယာယီအပစ်ရပ် ထုတ်ပြန်ချက် အပိုဒ်(၄)ပါ အကြောင်းအရာ ကတော့ “ယာယီပစ်ခတ် တိုက်ခိုက်မှုရပ်စဲရေးကာလ” စစ်ကောင်စီကရည်ညွှန်းတဲ့ ထိုကာလအတွင်း အပစ်ရပ်ထားမှာဖြစ်သော်လည်း စစ်ကောင်စီကလက်မခံတဲ့ ချွင်းချက်များကို ချိုးဖောက်တဲ့ လက်နက်ကိုင်များကိုတော့ တန်ပြန်တိုက်ခိုက်မှာ ဖြစ်တယ်လို့ ဖော်ပြထားသလို လက်နက်ကိုင်များအနေဖြင့် အင်အားစုဆောင်းခြင်းနှင့် စုဖွဲ့ပြင်ဆင်ခြင်းတို့ကို မပြုလုပ်ဖို့နှင့် ဆက်သွယ်ရေးလမ်းကြောင်းများ၊ အရပ်သားများနှင့် တပ်စခန်း၊ တပ်ဌာနချုပ်များကို တိုက်ခိုက်ခြင်း၊ နယ်မြေချဲ့ထွင်ခြင်းတို့ကို မပြုလုပ်ဖို့ အဲဒီအချက်တွေ ပါဝင်ပါတယ်။
ဓါတ်ပုံ – Gunmaw Sumlut Facebook (KIO ဒုတိယဗိုလ်ချုပ်ကြီး ဆွမ်လွတ်ဂွမ်မော် ဖေ့စ်ဘုတ်)
