တော်လှန်ရေးအင်အားစုတွေရဲ့ အပစ်ရပ်စဲမှုကို စစ်ကောင်စီက လက်မခံ
ဖက်ဒရယ်ဂျာနယ်၊ မြန်မာ
ဧပြီ ၁၊ ၂၀၂၅
ငလျင်ဒဏ်သင့်ပြည်သူများအတွက် ကယ်ဆယ်ရေးလုပ်ငန်းများ ဦးစားပေး ဆောင်ရွက်နိုင်ဖို့ တော်လလှန်ရေး အင်အားစုတွေဘက်က အပစ်ရပ်စဲမှာ ဖြစ်တယ်လို့ ကြေညာထားပေမယ့် စစ်ကောင်စီက ဆက်လက် လက်မခံကြောင်း ပြောပါတယ်။
ဒီကနေ့ည ဧပြီ ၁ ရက် နေပြည်တော်မှာ ပြုလုပ်တဲ့ ငလျင်ဒဏ်သင့်ဒေသများနှင့် ပတ်သက်ပြီး အလှူငွေပေးအပ် လှူဒါန်း ပွဲကတဆင့် “အချို့ တိုင်းရင်းသားလက်နက်ကိုင်အဖွဲ့များအနေနဲ့ လက်ရှိအချိန်မှာ တိုက်ပွဲဖော်ဆောင်ခြင်းမရှိပေမယ့် တိုက်ခိုက် မှုများ လုပ်ဆောင်ဖို့ စုဖွဲ့ခြင်း၊ လေ့ကျင့်ပြင်ဆင်ခြင်းများ လုပ်ဆောင်နေတာကို သိရှိထားပြီဖြစ်လို့ အဲဒီလို အခြေအနေတွေဟာ အချိန်မရွေး တိုက်ခိုက်မှု ပြုလုပ်လာနိုင်တာဖြစ်လို့ စစ်ကောင်စီ တပ်အနေဖြင့် လိုအပ်တဲ့ ကာကွယ်ရေးဆိုင်ရာလုပ်ငန်းများ ဆက်လက်လုပ်ဆောင်သွားမှာ ဖြစ်တယ်”လို့ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်က အခုလို တုံ့ပြန်လိုက်တာလို့ စစ်ကောင်စီရဲ့ အာဘော် သတင်း ထုတ်လွင့်ချက်မှာ ဖော်ပြပါတယ်။
အမျိုးသားညီညွတ်ရေးအစိုးရ(NUG) ဘက်ကတော့ ပြီးခဲ့တဲ့မတ်လ ၂၉ ရက်နေ့မှာ ခုခံကာကွယ် စစ်မှလွဲ၍ ထိုးစစ်အားလုံး မတ်လ ၃၀ မှ ဧပြီ ၁၂ အထိ ရပ်ဆိုင်းကြောင်း ကြေညာထားတာဖြစ်ပြီး မြောက်ပိုင်း ညီနောင် သုံးဖွဲ့များဖြစ်တဲ့ အာရက္ခတပ်တော် (AA)၊ ကိုးကန့်တပ် (MNDAA)နှင့် တအာင်းတပ်မတော်(TNLA) တို့ကလည်း စစ်ကောင်စီနှင့် တိုက်ပွဲဖြစ်ပွားလျက်ရှိနေတဲ့ နေရာများမှာ ခုခံကာကွယ်တဲ့ တုံ့ပြန်မှုမျိုးမှလွဲ၍ စတင်ထိုးစစ်ဆင် တိုက်ခိုက်မှု မပြုလုပ်ဘဲ ဧပြီလ ၁ လလုံး တဖက်သတ် အပစ်အခတ်ရပ်စဲကြောင်း ဒီကနေ့ ဧပြီ ၁ ရက်နေ့မှာ ကြေညာထားပါတယ်။
ဒါပေမယ့် စစ်ကောင်စီကတော့ လက်ရှိ ပြင်းထန်တဲ့ ငလျင်လှုပ်ခတ်မှုကြောင့် ထိခိုက်ပျက်စီးကြီးမားကာ လူသေဆုံးမှု များပြားနေတဲ့ အခုရက်သတ္တပတ်အတွင်းမှာပင် တိုင်းရင်းသား ဒေသတွေမှာ လေကြောင်းနဲ့ လက်နက်ကြီး ပစ်ခတ်တိုက်ခိုက်မှုများ ဆက်လက် လုပ်ဆောင်နေပါတယ်။
Photo: Getty Images
