ဓါတ်ပုံ – Getty Images
ဖက်ဒရယ်ဂျာနယ် မြန်မာ၊ ဇန်နဝါရီ ၂၅၊၂၀၂၃
ကချင်-စစ်ကိုင်းနယ်စပ် ကနီမှာ ယမန်နေ့ ဇန်နဝါရီ ၂၄ ရက်နေ့ မနက် ၈ နာရီခန့်က စစ်ကောင်စီတပ်နဲ့ ကချင်ဒေသကာကွယ်ရေးတပ် KPDF တို့ကြား နှစ်ဖက်တိုက်ပွဲ ပြင်းထန်စွာ ဖြစ်ပွားခဲ့တယ်လို့ သိရပါတယ်။
စစ်ကောင်စီတပ်က နဘားကျေးရွာအနီး စစ်ရေးလှုပ်ရှားမှု ပြုလုပ်နေချိန် KPDF ပူပေါင်းတပ်နဲ့ ထိပ်တိုက် တွေ့ဆုံခဲ့တာကြောင့် တိုက်ပွဲပြင်းထန်စွာဖြစ်ပွားခဲ့တာလို့ KIA အာဘော် သတင်းအရင်းအမြစ်မှာ ဖော်ပြပါတယ်။
ယခုပတ် ရက်သတ္တပတ်အတွင်း ကသာအထက်ပိုင်း မိုးတားလေးကျေးရွာအနီး စစ်ကောင်စီတပ်က စစ်အင်အား တိုးချဲ့ကာ ထိုးစစ်ဆင်တိုက်ခိုက်လာလို့ KPDF ပူပေါင်းတပ်နဲ့ တိုက်ပွဲပြင်းထန်နေတာဖြစ်ပြီး စစ်ကောင်စီ တပ်ဘက်မှ လေကြောင်းပစ်ကူဖြင့်ပါ တိုက်ခိုက်နေတာလို့ ဆိုပါတယ်။
လေကြောင်းတိုက်ခိုက်မှုများကြောင့် အရပ်သားပြည်သူ ထိခိုက် အသက်ဆုံးရှုံးမှုတွေရှိခဲ့သလို နေအိမ်များလည်း ထိခိုက်ပျက်စီးမှုတွေ ရှိခဲ့တယ်လို့ သိရပါတယ်။
ဒါ့အပြင် ကေအိုင်အေတပ်မဟာ ၉ တပ်ရင်း ၆ နယ်မြေ ဖားကန့်မြို့အနီးတွင်လည်း ဇန်နဝါရီ ၂၃ ရက်နေ့ ညနေပိုင်း ၅ နာရီခန့်တွင် စစ်ကောင်စီတပ်နဲ့ ကေအိုင်အေတပ်ကြား တိုက်ခိုက်မှုရှိခဲ့တယ်လို့ သိရပါတယ်။
ဖားကန့်မြို့၊ မရှီကထောင် တရုတ်ဘုံကျောင်းမှာ တပ်စွဲထားတဲ့ အင်အား ၁၅ ဦးရှိတဲ့ စစ်ကောင်စီတပ် ခလရ ၇၆ နဲ့ ပြည်သူ့စစ်အဖွဲ့တို့ကို ကေအိုင်အေရဲဘော်များက ပစ်ခတ်တိုက်ခိုက်ခဲ့ပြီး ယူမာကျေးရွာအနီး နှစ်ဖက် ထိတွေ့ တိုက်ပွဲ ဖြစ်ပွားခဲ့ကြပါတယ်။။
