မြန်မာ ပြည်သူ တို့၏ အောင်ပွဲ၊ ကုလ လုံခြုံရေး ကောင်စီမှ ကန့်ကွက်သူ မရှိ ဆုံးဖြတ်ချက် ချပြီ
– လှစိုးဝေ
ယနေ့ ပြုလုပ်သော ကုလ လုံခြုံရေး ကောင်စီမှ ၇၄ နှစ် အတွင်း ပထမဆုံး အကြိမ် အဖြစ် နိုင်ငံတွင်း အကြမ်း ဖက်မှုများ ချက်ချင်း အဆုံးသတ်ရေး နှင့် နိုင်ငံတော် အတိုင်ပင်ခံ ဒေါ်အောင်ဆန်းစုကြည်၊ သမ္မတကြီး ဦးဝင်းမြင့် အပါအဝင် နိုင်ငံရေး အကျဉ်းသား အားလုံးကို လွှတ်ပေးရန် ဆုံးဖြတ်ချက် အမှတ် ၂၆၆၉ အား ထောက်ခံမဲ ၁၂ မဲ၊ ကန့်ကွက်သူ မရှိ ချမှတ်လိုက်ပြီ ဖြစ်သည်။
ရုရှား၊ တရုတ် နှင့် အိန္ဒိယ တို့က မဲမပေးဘဲ ကြားနေခဲ့ကြသည်။ ဗီတိုအာဏာဖြင့် ပယ်ချခွင့် ရှိနေသည့် တရုတ် နှင့် ရုရှားတို့မှ ယခုအကြိမ်တွင် ကန့်ကွက်ခဲ့ခြင်း မရှိ၍ ထိုသို့ ဆုံးဖြတ်ချက်ကို ပထမဆုံး အကြိမ် ချမှတ် နိုင်ခဲ့ ကြခြင်းလည်း ဖြစ်သည်။
ထိုအဆိုအား ဗြိတိန်မှ ကမကထ ပြု တင်သွင်းလာခြင်းဖြစ်ပြီး ဆုံးဖြတ်ချက် အဆိုမူကြမ်းကို ထုံးစံအတိုင်း ရုရှား၊ တရုတ်တို့၏ ဗီတို နှင့် ရင်ဆိုင်ရဖွယ် ရှိ၍ မျှော်လင့်ချက် မရှိလှဟု ယူဆရသော်လည်း အဆိုတင်သွင်း သည့် နိုင်ငံများကလည်း ထိုနိုင်ငံများမှ ဗီတို အာဏာ သုံး၍ ကမ္ဘာ အလယ်တွင် ဆိုးသွမ်းလှသော အကြမ်းဖက် စစ်တပ်အပေါ် ကာကွယ်ပေးနေမှု ကို ပေါ်လွင်စေရန် ရည်ရွယ်ချက်ဖြင့် လုပ်ဆောင်လာကြခြင်း ဖြစ်သည်။
မိမိတို့ နိုင်ငံ၏ ဂုဏ်သိက္ခာသည် ဆိုးသွမ်းလှသော အကြမ်းဖက် စစ်တပ် ဖက်မှ ဆက်လက် ရပ်တည်ပေးနေပါက ကျဆင်းဖွယ် သာ ရှိတော့သည်ဟု ယူဆလာကြပြီ ဖြစ်၍ ယခုလို ကန့်ကွက်ခဲ့ကြခြင်း မရှိ၊ ကြားနေခဲ့ကြခြင်းသာ ဖြစ်သည်။
ကမ္ဘာအကြီးဆုံး ဒီမိုကရေစီနိုင်ငံ အိန္ဒိယ မှ ကြားနေ ခဲ့ခြင်းကတော့ စိတ်မကောင်း ဖွယ်ရာပင် ဖြစ်သည်။
ဘန်ကောက်ပို့စ် သတင်းစာကြီး တွင် မြန်မာအရေးကို အစဉ်တစိုက် သုံးသပ်ဝေဖန်နေသည့် ဝါရင့် ဆောင်းပါးရှင် ကာဗီ ချောင်တီရာဗွန်မှ အထက်ပါ ခေါင်းစဉ် ဖြင့် သုံးသပ်တင်ပြသွားခဲ့သည်။
ဗြိတိန်မှ ထိုဆုံးဖြတ်ချက်ကို ဩဂုတ်လ ကတည်းက ကျန် လုံခြုံရေး ကောင်စီဝင် နိုင်ငံများ၊ အာဆီယံ နိုင်ငံများ၊ အခြား ပတ်သက်နေသည့် နိုင်ငံများ နှင့် အသေးစိတ် ညှိနှိုင်း ပြီးနောက် ယခုလို ချမှတ်နိုင်ခဲ့ခြင်း ဖြစ်သည်ဟု ကုလ ဆိုင်ရာ ဗြိတိန် သံအမတ်ကြီး ဘာဘရာ ဝုဝပ်ဒ် မှ ကောင်စီ၏ သဘာပတိ ဖြစ်သူ အိန္ဒိယ သံအမတ်ကြီး မစ္စက် ရူချီရာ ကမ်ဘော့ချ် အား ယခုလို ရှင်းပြခဲ့သည်။
၂၀၂၁ ဖေဖေါ်ဝါရီလမှစ၍ စစ်တပ်သည် မြန်မာပြည်သူတို့၏ ဆန္ဒကို ဆန့်ကျင်ကာ ဒီမိုကရေစီ ကျကျ ပြုလုပ် ခဲ့သော ရွေးကောက်ပွဲ ရလဒ်ကို အသိအမှတ် ပြုရန် ငြင်းဆန်ပြီး အာဏာသိမ်းယူခဲ့ပြီး ချိန်မှစ၍ မြန်မာပြည်သူ ၅၅ သန်း တို့ အဖို့ လူမှုရေး၊ နိုင်ငံရေး နှင့် စီးပွားရေး အစရှိသည် တို့ ကသောင်းကနင်း ဖြစ်ကာ ဆက်တိုက် ဆိုသလို ဒုက္ခပင်လယ် ဝေခဲ့ရပါတယ်။
စစ်တပ်၏ အာဏာသိမ်းမှုကြောင့် ဒေသတွင်း တည်ငြိမ်ရေး အတွက် ဆိုးကျိုးများ ဖြစ်ပေါ်လာစေခဲ့သည့်အပြင် ရိုဟင်ဂျာ များ ရင်ဆိုင်နေရသော အခြေအနေများသည်လည်း ပို၍ ဆိုးဝါးသွားစေခဲ့ပါတယ်။
သဘာပတိကြီးရှင့် ယခု လို ဆုံးဖြတ်ချက် ချမှတ်နိုင်ခဲ့ခြင်းကြောင့် ကုလ အနေဖြင့် အာဆီယံ နိုင်ငံ ခေါင်းဆောင် များမှ ၎င်းတို့ ကြိုးပမ်းနေမှုများကို ထောက်ခံပေးရန် တောင်းဆို မှုကို တုန့်ပြန်နိုင်ခဲ့ခြင်း ဖြစ်ပါတယ်။
ယခု ဆုံးဖြတ်ချက်တွင် အကြမ်းဖက်မှုများ ရပ်တန့်ရေး၊ အာဆီယံ၏ အချက် ငါးချက်အား ချက်ချင်း လက်ငင်း အကောင်အထည် ဖေါ်ရန်၊ မြန်မာ ပြည်သူတို့၏ ဒီမိုကရေစီကျကျ ဆုံးဖြတ်ခဲ့သည့် ဆန္ဒကို လေးစားလိုက်နာရန်၊ လူ့အခွင့်အရေး ကို လေးစားရန်၊ လေးစားခြင်း မရှိ ကျူးလွန် ဖေါက်ဖျက် သူများကို တာဝန်ခံမှု ရှိလာရေး ဆောင် ရွက်ရန်၊ အကူအညီ လိုအပ်နေသူများအတွက် အတားအဆီး မရှိ လူလူချင်း စာနာထောက်ထားမှု အကူအညီများ ပေးနိုင်ရေးအတွက် ခွင့်ပြုရန်၊ ဒေါ်အောင်ဆန်း စုကြည် နှင့် သမ္မတ ဦးဝင်းမြင့် တို့ အပါအဝင် ထင်ရာ မြင်ရာ ဖမ်းဆီးခံ ထားရသူ အားလုံး ပြန်လွှတ်ပေးရန်တို့ ပါဝင်ပါတယ်။
မတ်လ အတွင်း အထွေထွေ အတွင်းရေးမှူးချုပ်၏ ရှင်းလင်းချက်ထဲတွင် ပါရှိသည့် အတိုင်း ယခု ဆုံးဖြတ် ချက်သည် နိုင်ငံတွင်း လက်ရှိ အမှန်အတိုင်း ဖြစ်ပေါ်နေသော အခြေအနေများကို စီစစ် ဆုံးဖြတ်ရန် အာဏာ အပ်နှင်းခဲ့ပြီ ဖြစ်၍ လွန်စွာ အရေးပါသည့် အခွင့်အလမ်းများ ထွက်ပေါ်လာခဲ့ရပြီ ဖြစ်ပါတယ်။
ယနေ့ ဆုံးဖြတ်ချက်ဟာ မြန်မာ စစ်တပ်အား မိမိတို့ အနေဖြင့် ယခု ဆုံးဖြတ်ချက် အပေါ် မဖြစ်မနေ အပြည့်အဝ အကောင်အထည် ဖေါ်သွားမည်ကို ယုံမှား သံသယ မရှိရန် ပြတ်သားစွာဖြင့် အကြောင်းကြားစာ ပေးပို့လိုက်ခြင်း လည်း ဖြစ်ပါတယ်။
တဖန် မြန်မာပြည်သူများ အားလည်း မိမိတို့ မှ ၎င်းတို့၏ အခွင့်အရေးများ၊ ဆန္ဒ အကျိုးစီးပွား များ နှင့် တထပ် တည်း ကျအောင် ဖေါ်ဆောင်ပေးသွားမည်ကိုလည်း အသိပေးလိုက်ခြင်း ဖြစ်ပါတယ် အစရှိသည်ဖြင့် ပြောဆို သွားခဲ့သည်။
အဆိုပါ ရှင်းလင်းချက် အား ဗြိတိသျှ နိုင်ငံခြားရေး ဝန်ကြီးဌာနမှ ဗြိတိန်သည် မြန်မာ ပြည်သူများ နှင့် အတူ ရပ်တည်သွားမည် ဖြစ်ပြီး စစ်အာဏာသိမ်း အဖွဲ့ အနေဖြင့် ပြည်သူများ ထံ အာဏာ ပြန်လည် အပ်နှင်းရန် အချိန်တန်ပြီ ဟူသော ခေါင်းစဉ် ဖြင့် တရားဝင် ကျေညာချက် ထုတ်ပြန်ခဲ့သည်။
ကလု လုံခြုံရေး ကောင်စီ တွင် ဗီတို အာဏာ ကိုင်စွဲထားသည့် နိုင်ငံကြီး ငါးနိုင်ငံ အပြင် လက်ရှိတွင် အလှည့်ကျ အဖွဲ့ဝင်များ အဖြစ် အယ်ဘေးနီယား၊ ဘရာဇီး၊ ဂါဘွန်၊ ဂါနာ၊ အိန္ဒိယ၊ အိုင်ယာလန်၊ ကင်ညာ၊ မက္ကဆီကို၊ နော်ဝေး နှင့် ယူအေအီး တို့ ပါဝင်ကြသည်။
ကျွန်တော်တို့ မြန်မာပြည်သူများ အနေဖြင့် တော်လှန်ရေးကြီး အောင်မြင်ရာ အောင်မြင်ကြောင်း ဘက်ပေါင်းစုံမှ အကူအညီပေးလာနေပြီ ဖြစ်၍ မိမိတို့ ပန်းတိုင်ကို မျက်ခြေမပြတ်ဘဲ စည်းစည်းလုံးလုံး ဖြင့် ဆောင်ရွက်သွားရန် လိုအပ်နေပေသည်။
ယခုလို စည်းလုံးညီညွတ်စွာ ဆန့်ကျင်တွန်းလှန် နိုင်ခဲ့ကြ၍လည်း စစ်အုပ်ချုပ်ရေး လက်အောက်တွင် နေခဲ့ရ သည့် နှစ်ပေါင်း ၆၀ ကျော် ကာလအတွင်း ရုရှား တရုတ်တို့ပင် ဗီတို အာဏာ မသုံးနိုင်တော့ကာ အလျော့ပေး ခဲ့ရသည် အထိ ဖြစ်လာ၍ ပထမဆုံးအကြိမ် လုံခြုံရေး ကောင်စီ၏ ဆုံးဖြတ်ချက် ထွက်ပေါ်လာခဲ့ရခြင်း ဖြစ်သည် မဟုတ်ပါလား။
ထိုအတွက် အမြင်မတူသည်များကို ခဏ ဘေးချိတ်ပြီး ညီညွတ်မှု အရှိန်ကို ဆက်လက် မြှင့်တင်သွားဖို့ လိုအပ်နေ ပေသည်။ သူတလူ ငါတမင်း လုပ်နေကြမည်ဆိုလျှင် မိမိတို့ တော်လှန်ရေးသည် ဆီးရီးယားကဲ့သို့ ရေစုန်မျောသွားနိုင်ကို သတိချပ်ဖို့ လိုအပ်လှပေသည်။
