“နှလုံးခါမြို့ (Or) လေးကေ့”
နာကျင်လိုက်ရတဲ့ ရက်/လ/ နှစ်
အသစ်တွေ မဖြစ်ခဲ့ဘူး။
ပျောက်ကြား ဝတ်စုံလေးတွေနဲ့
ချာတိတ်တွေပြောတဲ့
နှလုံးခါ မြို့ရဲ့အနာဂတ်
မငြိုမငြင် ငါတို့ယုံခဲ့တယ်။
ဗုံး၊ စက်သေနတ် အမြောက်
ကြိုက်တာနဲ့ ခြောက်
နေရာပျောက်ပါစေဦး
ချာတိတ်တွေကို ယုံယုံကြည်။
လ.သား ချာတိတ်တွေဟာ
ကျည်/အမြောက်ဆံကြား
ဟေးဟေးဟားဟား
ဘာများ နာစရာရှိလဲ?
ရှုပ်ပွ /ပျက်စီးနေတဲ့ ရပ်ကွက်ထဲက
အိမ်တွေကို ဒီချာတိတ်တွေ
ကျိန်းသေ ပြုပြင် ဖေးဖလိမ့်မယ်။
ကွဲကွာသွားတဲ့ မိသားစုတွေကို
ချာတိတ်တွေ ပြန်ရှာပေးလိမ့်မယ်။
နှလုံးဆပ်ဆပ်ခါ သမျှ
ဘဝ ရင်းပြီး နှစ်သိမ့်ပေးလိမ့်မယ်။
ချာတိတ်တွေဟာ
တင်မိုးလိုကဗျာစိတ်အပြည့်
တော်လှန် စိတ်အပြည့်
အရိုးခံ အပြည့်
နှလုံးခါ မြို့ကို
နှလုံးသားနဲ့ ပြုပြင်လိမ့်မယ်။
တကွဲတပြားဖြစ်ရလို့
ငါဟာ အလိုမကျဖြစ်ခဲ့ရ
ချာတိတ်တွေကိုကြည့်တော့
ရှိသမျှ မိသားစုကို ပစ်ပစ်ခွာခွာ။
နှလုံးသား ငါ့ထက် မမာတဲ့ လူငယ်ပေါက်စလေးတွေ။
ဟေ့…လေးကေ့ရေ
ဟေ့ နှလုံးခါမြို့လေးရေ
ချိုင်းဝှမ်း အပြည့် မျက်ရည်တွေ သုတ်
မဆုတ်မနစ်တဲ့ လူငယ်တွေက
ပစ်သွားမယ်တဲ့လား?
သမိုင်းထဲက မင်းအမည်
ဒီချာတိတ်တွေ မေ့ရိုးလား?
အစုတ်အပြတ်တွေကြား
ဟေးဟား ပျော်ရွှင်ပါစေသား။ ။
ရဲဘော် Scope
(လေးကေ့ရွာခံ နေရာမှ ရေးသားသည်။)
