မိုးခြားတဲ့ ဘဝများ
တောင်ထိပ်မှာမိုးညို့လာပြီ
ဒီနေ့လည်း တနေကုန်ရွာမယ်ထင်ပါရဲ့
ညကလည်း မိုးမတိတ်ဘူး
တဝမ်းတခါးအတွက်
အလုပ်မသွားဘဲ နေလို့မရ
မိန်းမမှာ ငွေလက်ကျန်နည်း
ကလေးကလည်း ခပ်ချွဲချွဲမို့
ဓားလေးဆွဲ အသာလေးထွက်ခဲ့တယ်
ရှာသလောက် မလောက်ငတဲ့ငွေ
ယောက္ခမနဲ့အမေကပေးလည်း
ပေါက်စကလေးနှစ်ယောက်နဲ့ မို့
နေ့ဖို့ညစာကလွဲရင် အပိုမရှိ
တောင်ပေါ်ထင်းခုတ်
တောင်အောက်ထင်းသယ်
ဝယ်သူထံအပ်
နေ့စဉ်မပျက် သူလုပ်ခဲ့တယ်
မိုးစဲတော့ ခဏနား
ခုတ်ပြီးသား ထင်းမျာစု
အားပြုလို့ ပုခုံးမှာထမ်း
လာလမ်းအတိုင်း ပြန်ခဲ့တယ်
တဝေါဝေါမြည်သံလည်းသူမကြား
မိုးပေါက်များနဲ့ သူ့ခြေလှမ်း
အိမ်သို့သာ အရောက်လှမ်းနေခဲ့တယ်
အရှိန်နဲ့လာတဲ့ တောင်ကျမိုးရေ
သူ့ခြေထောက်တွေ သယ်ဆောင်သွားခဲ့
သတိကိုကပ် အားတင်းရပ်လည်း
မစွမ်းသာတော့
မျောလျက်လိုက်ပါ
ဘယ်လောက်ကြာမယ်မသိ
မိန်းမနဲ့ကလေးနှစ်ယောက်
သူ အိမ်တံခါးခေါက်လည်း
ဖွင့်မကြည့်တော့ပါလား။
စောလူးလူး
(ရေဘေးကြောင့် ကွဲကွာသွားကြတဲ့
မိသားစုများအတွက်ခံစားရေးဖွဲ့ပါတယ်)
