ဘုရားသုံးဆူမှာ ရပ်ကွက်အုပ်ချုပ်ရေးမှူးဟောင်း သေနတ်ဖြင့်ပစ်သတ်ခံရ
ဖက်ဒရယ်ဂျာနယ်၊ မြန်မာ
ဒီဇင်ဘာ ၈၊ ၂၀၂၃
ကရင်ပြည်နယ်၊ ကြာအင်းဆိပ်ကြီးမြို့နယ်၊ ဘုရားသုံးဆူမြို့တွင် ရပ်ကွက်အုပ်ချုပ်ရေးမှူး ဟောင်းတဦး သေနတ်ဖြင့်ပစ်ခတ်ခံခဲ့ရတယ်လို့ ဒေသခံတွေထံမှ သိရပါတယ်။
ဒီဇင်ဘာလ ၅ ရက်နေ့ နံနက် ၉ နာရီ ၃၀ မိနစ်က ဘုရားသုံးဆူမြို့၊ အမှတ်(၃)ရပ်ကွက်၊ ကံ့ကော်(၄) လမ်း နေ အသက် ၆၅ နှစ်အရွယ် ဦးမြတ်ကျော်နှင့် ၎င်း၏ ဇနီးဖြစ်သူတို့ နေအိမ်မှာ ရှိနေစဉ် ပစ်ခတ်ခံခဲ့ရခြင်းဖြစ်ပါတယ်။
ဦးမြတ်ကျော်ဟာ ယခင်က အုပ်ချုပ်ရေးမှူးတစ်ဦးဖြစ်ခဲ့ပြီး ယခုအချိန်မှာ အုပ်ချုပ်ရေးမှူးမဟုတ်သော်လည်း စစ်ကောင်စီ၏ထောက်တိုင် သတင်းပေးအနေနဲ့ ပြုလုပ်လျှက် ရှိတယ်လို့ ဒေသခံတွေထံမှ သိရပါတယ်။
” သူက အခု စစ်တပ်ကို သတင်းပေးအနေနဲ့ လုပ်နေတာ။ ဘယ်သူလာပစ်သွားတယ်ဆိုတာကိုတော့ မသိဘူး။ သူကတော့ ပွဲချင်းပြီး သေသွားတယ် ” လို့ ဒေသခံတစ်ဦးမှ FJMM ကိုပြောပါတယ်။
အဆိုပါ ပစ်ခတ်ခံရမှုကြောင့် ဦးမြတ်ကျော်က အခင်းဖြစ်ပွားရာနေရာ၌သေဆုံးခဲ့ပြီး သူ၏ဇနီး မှာ ညာဘက်ပေါင်တွင် ဒဏ်ရာရခဲ့ပါတယ်။
ဦးမြတ်ကျော်နှင့်ဇနီးဖြစ်သူ ပစ်ခတ်ခံရမှုနှင့်ပတ်သက်ပြီး မည်သည့်အဖွဲ့က ပစ်ခတ်သွားတယ်ဆိုတာကို သီးခြားအတည်ပြုနိုင်ခြင်း မရှိသေးပါဘူး။
ပြီးခဲ့တဲ့ နိုဝင်ဘာလ ၂၃ ရက်နေ့ကလည်း ကော့ကရိတ်အခြေစိုက် ခလရ(၉၇)မှ ဒုတပ်ရင်းမှူးအေးချမ်းမှာ ဘုရားသုံးဆူရှိ ဆံပင်ညှပ်ဆိုင်တစ်ဆိုင်တွင်ရှိနေစဉ် စနိုက်ပါဖြင့်ပစ်ခတ်ခံရပြီး သေဆုံးခဲ့ပါတယ်။
