သုဝဏ္ဏဝတီမြို့မှာ စစ်ကောင်စီ၏ သတင်းပေးတစ်ဦး ပစ်ခတ်ရှင်းလင်းခံရ
ဖက်ဒရယ်ဂျာနယ်၊မြန်မာ
နိုဝင်ဘာ ၃၀၊ ၂၀၂၃
မွန်ပြည်နယ်၊ သထုံမြို့နယ်၊ သုဝဏ္ဏဝတီမြို့၊ ကျိုက္ကော်ရပ်ကွက်မှာ စစ်ကောင်စီ ၏ ထောက်တိုင် သတင်းပေးတစ်ဦးက တော်လှန်ရေး တပ်ဖွဲ့များရဲ့ ပစ်ခတ် ရှင်းလင်းမှုကို ခံခဲ့ရကြောင်း ဒေသခံတွေထံမှ သတင်းရရှိပါတယ်။
နိုဝင်ဘာလ ၃၀ ရက်နေ့ နံနက် ၉ နာရီခွဲ အချိန်ခန့်မှာ စစ်ကောင်စီ၏ ထောက်တိုင်ဖြစ်တဲ့ သတင်းပေး သန်းနိုင် ဆိုသူအား KNU/KNLA တပ်မဟာ ၁ မှ တပ်ရင်း ၂ လက်အောက်ခံ HRS မြို့ပြပျောက်ကျားတပ်ဖွဲ့မှ ကျည် ၅ ထောင့်နဲ့ ပစ်ခတ်ရှင်းလင်းခဲ့ကြောင်း သိရပါတယ်။
” သူက သတင်းပေးလုပ်နေတာ နှစ်ပေါက်နေပြီး။ အာဏာသိမ်းပြီးနောက်ပိုင်း သန်းနိုင်က ကိုယ်ကျိုးအတွက် တော်လှန်ရေးဆက်နွယ်မှု မှန်သမျှကို ချုပ်ကိုင်နေတာ ” လို့ ဒေသခံတစ်ဦးမှ FJMM ကိုပြောပါတယ်။
အဆိုပါပစ်ခတ်ခံရမှုကြောင့် ဦးသန်းနိုင်၏ ညာဘက်ရင်အုံတွင် ကျည်ထိမှန်ဒဏ်ရာရရှိခဲ့ကာ သိမ်ဆိပ်တိုက်နယ် ဆေးရုံသို့ ပို့ဆောင်ပြီး ဆေးကုသမှုခံယူနေစဥ် သေဆုံးသွားခဲ့ကြောင်း သိရပါတယ်။
ဦးသန်းနိုင်ဟာ အရင်နှစ် နိုဝင်ဘာက သထုံ-ပကဖ ရဲ့ တိုက်ခိုက်မှုကြောင့် သေဆုံးသွားခဲ့ရတဲ့ သထုံမြို့နယ်အတွင်း တော်လှန်ရေး အင်အားစုများကို ဦးဆောင်ဖြိုခွင်းသူ (လကရ ၉) မှ ဗိုလ်မှူး ချစ်ဝင်းသူရဲ့ တပည့်ရင်းတစ်ဦးဖြစ်တယ်လို့ သိရပါတယ်။
ဗိုလ်မှူး ချစ်ဝင်းသူနှင့်ပူးပေါင်းပြီး ထောက်ပို့တပ်ဖွဲ့ဝင်များ၊UG များ ကို ဒုက္ခအမျိုးမျိုးပေးပြီး အရပ်သားတွေကိုလည်း ဒုက္ခရောက်အောင် လုပ်ဆောင်ခဲ့တာတွေရှိတယ်လို့ သိရပါတယ်။
