“NUG” “အရေးပေါ် အခြေအနေ ကြေညာ”
ဖက်ဒရယ် ဂျာနယ်
စက်တင်ဘ ၇ ရက်၊ ၂၀၂၁
အမိန့်ကြေညာချက်အမှတ် (၁/၂၀၂၁) ပါ ကြေညာချက်ဖြင့် ပြည်ထောင်စု နိုင်ငံတော်
တစ်ဝန်းလုံး အရေးပေါ် အခြေအနေ ကာလ အဖြစ် စက်တင်ဘာ ၇ ရက် မှ စ၍ သတ်မှတ် ကြေညာလိုက်ကြောင်း
အမျိုးသား ညီညွတ်ရေး အစိုးရ (NUG)က ထုတ်ပြန်ထားသည်တွေ့ရသည်။
ကြေညာချက်တွင် အောက်ပါအတိုင်း ပါရှိသည်။
—————————————————————————
အမျိုးသားညီညွတ်ရေးအစိုးရ
ပြည်ထောင်စုသမ္မတမြန်မာနိုင်ငံတော်
အမိန့်ကြေညာချက်အမှတ် (၁/၂၀၂၁)
၇ စက်တင်ဘာလ ၂၀၂၁
“အရေးပေါ်အခြေအနေ ကြေညာခြင်း”
၁။ ပြည်ထောင်စုသမ္မတမြန်မာနိုင်ငံတော်တွင် ၂၀၂၁ခုနှစ် ဖေဖော်ဝါရီလ ၁ ရက်မှ စတင်၍ စစ်ကောင်စီသည် နိုင်ငံတော်၏ အချုပ်အခြာအာဏာကို လက်နက်အားကိုးဖြင့် အဓမ္မလုယူသိမ်းပိုက်ထားရုံမက ပြည်သူများ၏ အသက်အိုးအိမ်စည်းစိမ်ကို ထိပါး အကြမ်းဖက် အန္တရာယ်ပြုလျက်ရှိခြင်း၊ ပြည်သူများကလည်း နည်းလမ်းစုံဖြင့် စစ်အာဏာရှင်အုပ်စိုးမှုအား ခုခံတွန်းလှန်လျက်ရှိခြင်း၊ ယခုအခါ တရားမဝင် စစ်အုပ်ချုပ်ရေး ယန္တရား တစ်ခုလုံးကို အပြီးတိုင် ဖျက်သိမ်းပစ်ရန် လိုအပ်လာခြင်း ဟူသော ဖြစ်ပေါ်ပြောင်းလဲလျက်ရှိသည့် အခြေအနေ အရပ်ရပ်ကြောင့် အမျိုးသားညီညွတ်ရေးအစိုးရသည် ယနေ့ ၂၀၂၁ခုနှစ် စက်တင်ဘာလ ၇ ရက်မှ စတင်၍ နိုင်ငံတော်အား အရေးပေါ် အခြေအနေအဖြစ် သတ်မှတ်ကြောင်း ကြေညာလိုက်သည်။
၂။ အရေးပေါ်အခြေအနေ သက်ရောက်သည့်နယ်မြေသည် ပြည်ထောင်စုနိုင်ငံတော်တစ်ဝန်းလုံး ဖြစ်ပြီး၊ အချိန်ကာလအားဖြင့် ပြည်သူ့အုပ်ချုပ်ရေးအာဏာ ပြန်လည် ထူထောင်နိုင်သည့် အချိန်အထိ သတ်မှတ်သည်။
ဒူဝါလရှီးလ
ယာယီသမ္မတ
အမျိုးသားညီညွတ်ရေးအစိုးရ
ပြည်ထောင်စုသမ္မတမြန်မာနိုင်ငံတော်။
